ఏపీ హైకోర్టు : ఆంధ్రప్రదేశ్‌లో స్థానిక సంస్థల ఎన్నికలకు రంగం సిద్ధమైంది. స్థానిక సంస్థల ఎన్నికల నిర్వహణకు సంబంధించి ఏపీ హైకోర్టు తాజా ఆదేశాలు కొత్త చర్చకు తెరతీశాయి. ఎన్నికల ప్రక్రియను ఆరు వారాల్లో ప్రారంభించాలని న్యాయస్థానం స్పష్టం చేయడం రాజకీయ పార్టీల్లో కదలికకు కారణమైంది. ఎన్నికల సంఘం, రాష్ట్ర ప్రభుత్వం పరస్పర సమన్వయంతో ముందుకు సాగాలని కోర్టు సూచించింది. స్థానిక సంస్థల ఎన్నికలను స్పెషల్ ఇంటెన్సివ్ రివిజన్ (SIR) ప్రక్రియ […]
ఏపీ హైకోర్టు : ఆంధ్రప్రదేశ్‌లో స్థానిక సంస్థల ఎన్నికలకు రంగం సిద్ధమైంది. స్థానిక సంస్థల ఎన్నికల నిర్వహణకు సంబంధించి ఏపీ హైకోర్టు తాజా ఆదేశాలు కొత్త చర్చకు తెరతీశాయి. ఎన్నికల ప్రక్రియను ఆరు వారాల్లో ప్రారంభించాలని న్యాయస్థానం స్పష్టం చేయడం రాజకీయ పార్టీల్లో కదలికకు కారణమైంది. ఎన్నికల సంఘం, రాష్ట్ర ప్రభుత్వం పరస్పర సమన్వయంతో ముందుకు సాగాలని కోర్టు సూచించింది.
స్థానిక సంస్థల ఎన్నికలను స్పెషల్ ఇంటెన్సివ్ రివిజన్ (SIR) ప్రక్రియ పూర్తయ్యే వరకు నిర్వహించకూడదంటూ వైసీపీ గతంలో కోర్టును ఆశ్రయించింది. అయితే ఈ వాదనకు హైకోర్టులో అనుకూల ఫలితం లభించలేదు. SIR ప్రక్రియతో ఎన్నికల నిర్వహణను ముడిపెట్టాల్సిన అవసరం లేదనే అభిప్రాయం వ్యక్తం చేస్తూ.. నిర్ణీత ప్రక్రియ ప్రకారం స్థానిక ఎన్నికలను నిర్వహించేందుకు మార్గం సుగమం చేసింది.
ఇక ఈ వ్యవహారంలో అత్యంత కీలకమైన మరో అంశం బీసీ రిజర్వేషన్లకు సంబంధించినది. గత వైసీపీ ప్రభుత్వ హయాంలో తీసుకున్న 34 శాతం బీసీ రిజర్వేషన్ నిర్ణయంపై కూడా హైకోర్టు కీలక వ్యాఖ్యలు చేసింది. స్థానిక సంస్థల్లో రిజర్వేషన్లు మొత్తం 50 శాతం పరిమితిని దాటకూడదని స్పష్టం చేసింది. బీసీ రిజర్వేషన్ల అంశం మరోసారి రాజకీయంగా ప్రాధాన్యత సంతరించుకుంది.
ఈ పరిణామాల నేపథ్యంలో వచ్చే ఆరు వారాలు ఆంధ్రప్రదేశ్ రాజకీయాల్లో కీలకంగా మారనున్నాయి. ఎన్నికల షెడ్యూల్‌కు సంబంధించిన కసరత్తు ప్రారంభమైతే గ్రామాలు, మండలాలు, జిల్లాల్లో రాజకీయ వాతావరణం ఒక్కసారిగా వేడెక్కే అవకాశం ఉంది. ఇప్పటికే అసెంబ్లీ ఎన్నికల తర్వాత పార్టీ శ్రేణులను పునర్వ్యవస్థీకరించుకునే పనిలో ఉన్న వైసీపీకి స్థానిక ఎన్నికలు మరో పెద్ద పరీక్షగా మారనున్నాయి.
అయితే స్థానిక ఎన్నికలను తేలిగ్గా తీసుకోవద్దని వైసీపీ అధినేత వైఎస్ జగన్ పార్టీ శ్రేణులకు సూచించినట్లు తెలుస్తోంది. అన్ని స్థానాల్లో పార్టీ పోటీ చేయడానికి ఆయన ఇప్పటికే దిశానిర్దేశం చేసిన నేపథ్యంలో.. అభ్యర్థుల ఎంపిక, స్థానిక నాయకత్వాన్ని సమన్వయం చేయడం, కేడర్‌ను మళ్లీ యాక్టివ్ చేయడం వైసీపీకి కీలకంగా మారనుంది.
మరోవైపు అధికార కూటమి కూడా స్థానిక సంస్థలపై పట్టు సాధించేందుకు వ్యూహాలు సిద్ధం చేసుకునే అవకాశం ఉంది. వైసీపీ ఈ ఎన్నికలను తన కేడర్‌కు పునరుత్తేజం కల్పించే అవకాశంగా చూడాల్సి ఉంటుంది.
మొత్తంగా చూస్తే.. హైకోర్టుతో ఏపీలో స్థానిక ఎన్నికల ప్రక్రియకు కదలిక వచ్చింది. రాబోయే వారాల్లో ఎన్నికల సంఘం తీసుకునే నిర్ణయాలు, రిజర్వేషన్ల ఖరారు, అభ్యర్థుల ఎంపిక వంటి అంశాలు రాష్ట్ర రాజకీయాలను మరింత వేడెక్కించే అవకాశం ఉంటుంది. ఎన్నికల అసెంబ్లీ తర్వాత తొలిసారిగా రాష్ట్రవ్యాప్తంగా స్థానిక స్థాయిలో జరగబోయే ఈ ఎన్నికలు అధికార కూటమిని పరీక్షించడంతో పాటు వైసీపీ పునరాగమనానికి కూడా ఒక కీలక రాజకీయ పరీక్షగా మారనున్నాయి.
